أقترح علي أحد الاصدقاء العديد من الأفكار للمشاركة الفعالة في تعمير مصر ، وقد حرك بداخلي الكثير من الاحاسيس تجاه الواجب الذي كنت مقصراً فيه لسنوات ، لذا قررت ان يكون هذا الموضوع هو بذرة الافكار لكل مزارع يريد ان يغرس نبتة صالحة في ارض الوطن في مصرنا:
وفيما يلي بعض الافكار التي وردت الي خاطرنا لتعمير مصر:
1- لا تقول بعد اليوم " احنا شعب كده....... منجيش الا بـ.........."" لاننا مش كده ، احنا صحيح في وسطنا بعض الفاسدين والمخربين ولكننا لسنا كذلك ، لذا يجب علينا ان نحارب هؤلاء اللي ""كده" ونقول : "في ناس كده" والناس دي مش مصريين بجد.
2- ابدأ بنفسك : يعني حاسب نفسك الاول ، يعني قيم نفسك " انا ؟% مثلا 40% طيب خلاص انا هبقي 60% ازاي ابدأ اختار عمل إيجابي اعمله من الاعمال اليومية او الاسبوعية.
3- ابدأ شوف اي طفل ابن احد من جيرانك او ابن البواب او ابن اي حد تعرفة او اخوك او قريبك وخصص له ساعة واحدة كل اسبوع او ساعتين ، تعلمه فيها القراءة والكتابة ولو بيعرف يقرأ علمة انجليزي ، او ساعدة في اي مادة عندة هو محتاجها.
4- انا مثلا مرتبي 1000 جنية مثلاً ، يعني لو اخذت منه 20-50 جنية كل شهر مش هيتخرب بيتي يعني ، واتفق مع 5 او 6 من اصحابي ان الي هنجمعه شهري للاسرة (س) وتبقي انت المسؤل عن الموضوع ده - مش صعبة والله - اسهل من الجمعيات اللي شعب مصر كله غرقان فيها ، ستجد نفسك كل شهر بتجمع حوالي 150 جنية او اكتر بتساعد بيهم اسرة بها ايتام او حالتهم المادية ضعيفة ، بس بشرط تتفق مع الناس اللي معاك انهم يثبتوا المبلغ ده شهريا ، وحاول تنشرها لغيرك ، تخيل ميزانك هيبقي عامل أزاي وانت في ناس بتدعيلك كل يوم.
5- امك وابوك " جنتك او نارك" صالحهم وراضيهم واكسب دنيتك واخرتك ،ولو متوفيين ، خصص لهم 5-6 مرات في اليوم تدعيلهم بالرحمة.
6- اقاربك اللي انت مشغول عنهم " كل يوم تكلم واحد منهم تطمئن علية بالتليفون بس ، وكل شهر مرة تزور حد فيهم " صلة الرحم".
7- لما تشوف حد بيرمي حاجة في الشارع " متكسفش " روح وشيلها قدامه وحطها علي جنب - من غير متبصله بأرف- وهو لوحده هيتعلم.
8- اللي شغال في مكان وعنده مكان فارغ يقول لاي حد من اصحابه عليه ويكسب ثواب .
9- واللي يتعرض عليه شغل مش متوافق مع إمكانياته وطموحة ميقولش لأ انا مستني وظيفة الاحلام ، يجرب ويحاول ويتعلم ، ويحاول يستغل خبراته ومهاراته في الشغل اللي يتقدمله وبعدين يدور براحتة علي اللي يناسبة وهو شغال ، " سيدنا محمد وسيدنا عيسي عملوا برعي الغنم".
وطبعاً في مليون فكرة ثانية بس دول اللي علي بالي دلوقتي ، وارجوا من كل اللي عنده فكرة ميبخلش علينا بيها في التعليقات.
